Mayuh macham burung baka burung bumai, burung kena bejalai, burung kena ngasu, bururng kena nyabung, bururng kena ngambi manang, dukun enggau Lemambang.

                                                    BURUNG EMBUAS
1. Enti kitai digagai Embuas lebuh maya nugal; enti kitai meda iya tunga kebaruh, reti iya Embuas bertanya ari Pulang Gana lalu enti iya terebai ke atas, reti iya Embuas betanya ari sengalang Burung :
         Ayu burung tu baka tu:
          i. sampai ke tubuh uchu ambu, enti sida ia begiga, sida deka bulih utai.
         ii. Enti mudas iya, babi bunuh enda tau mit, enda tau kurus laban iya enggai makai babi mit tauka kurus.
        iii. Munuh manuk indu tujuh iko enggau kekerungan-kerungan, manuk sabung bunuh siku, tuak tujuh
            rumbang lalu piring turun tujuh.
        iv. Menira tuatka tujuh iti, tua siti beri tinggi agi laban nyak ungkup ke sengalang burung.
2. Enti ningga Embuas kejang deka nurun nyabung, burung tu manah tang enti sema kitai ninga embuas lebuh udah datai di pendaie, burung tu enda badas.

                                                 BURUNG PAPAU/KELABU
1. Enti bisi ninga Papau ba hari nembuka tebang, burung tu manah laban antu jelu, chit, pipit, empangau alau semua rabun mata enda tepedaka umai kitai.

2. Enti kitai bisi ninga papau mansang ngasu, burung tu nda manah laban iya Burung Rabun.

                                              BURUNG NENDAK 
1. Raup Nendak ba pun jalai udah tembu nebas enda manah tang enti raup iya ba ujung jalai, burung tok manah ke dikumbai Raup Ulih.

2. Enti Nendak tama rumah ari puting setak, burung tok ngayuka siku orang bujang di rumah nyakdeka diambu indu ari rumah bukai dalam taun nyak.

                                                BURUNG BEJAMPUNG
1. Enti bejampung tama rumah, burung tu mali besai laban ngayuka rumah panjai nyak deka retung empa api. burung ke baka tu enda asuh intu orang ke nemu makai burung.

2. Enti manggul ngena bejampung, udahnyak ninga embuas, burung tu manah laban ngayuka umai deka angus ditunu. burung tu di kumbai Burung Pesuk Bandir.

                                               BURUNG PANGKAS/ KUTUK
1. Enti kitai ninga Pangkas maya ngetau, burung tu enda manah laban ngayuka padi ti di ketau kitai nya deka rua diempa.

2. Enti kitai ninga Pangkas mansang ngayau, burung tu enda manah laban ngayuka kitai munuh munsuh tang pala munsuh nyak enda ulih pumpung kitai. burung tu dikumbai burung lebu.
                                                                    

                                                  BURUNG KETUPUNG      
1. Enti ketupung deka bendar bemunyi lemai hari maya bumai, nya enda manah laban ngayuka umai siga sereta mayuh utai deka ngachau.


2. Enti Ketupung di umai temuda, enti temuda nya teleba alai mantaika padi, burunh tu enda manah tang enti sema kitai enda kala bulih padi ba temuda nyak, burung tu manah laban ngayuka kitai deka bulih padi.                                                  

                                                        BURUNG BERAGAI 
1. Enti kitai ninga Beragai lebuh nembuka tebang, burung tu enda manah laban ngayuka umai kitai enda angus di tunu.

2. Enti kitai ninga Beragai udah tembu manggul, burung tu manah laban ngayuka kitai bulih padi tang utai bukai ke ditanam kitai nya deka dikachau jelu tauka kera.

                                                                                                               Origin by, Gerempung jerita Tuai
                                                                                                                               Bangsa Iban.